Liverpooli e fiton në penallti trillerin me Arsenalin dhe kalon në çerekfinale të kupës

Liverpooli e fiton në penallti trillerin me Arsenalin dhe kalon në çerekfinale të kupës

Liverpooli e ka mposhtur 5:4 në penallti Arsenalin në një ndeshje dramatike me plot gola në 1/8 e finales në EFL Cup, duke kaluar në rundin tjetër.

Divock Origi ishte heroi i skuadrës së Jurgen Kloppit, duke ia siguruar penalltitë me golin e tij në minutën e 94-të në barazimin 5:5 në kohën e rregullt të mërkurën në Anfield.

Dani Ceballos e humbi penalltinë te Arsenali, ndërsa lojtarët e Liverpoolit ishin të gjithë të saktë dhe kështu të kuqtë kalojnë në çerekfinale të EFL Cup.

Në një ndeshje që i pati të gjitha, Arsenali luajti me Mesut Ozilin e padëshirueshëm titullar, por pa kapitenin Granit Xhaka pas zënkës së shqiptarit me tifozët e vet gjatë barazimit 2:2 me Crystal Palace në Premierligë në fundjavë.

Drama e golave në Anfield nisi me mbrojtësin shqiptar, Shkodran Mustafi, i cili shënoi në portën e vet për t’i dhënë epërsinë vendasve në minutën e 6-të.

Arsenali reagoi duke shënuar tri herë brenda 17 minutave, me Lucas Torreira në minutën e 19-të dhe Martinellin në minutat 26-të dhe 36-të.

James Milner e mbajti Liverpoolin në lojë duke shënuar nga penalltia dy minuta para përfundimit të pjesës së parë.

Niles e ktheu epërsinë e dyfishtë të vizitorëve duke realizuar në minutën e 54-të.

Chamberlain dhe Origi me dy gola të shpejtë në minutat 58-të dhe 62-të përkatësisht, e barazuan rezultatin për vendasit.

Joseph Willock e kaloi Arsenalin në epërsi për herë të fundit në takim, duke e shënuar golin e mbrëmjes nga largësia.

Ai e bombardoi portën e Liverpoolit me një goditje të fuqishme nga rreth 30 metra.

Por, heroi i Liverpoolit ishte Origi, i cili shënoi gol të bukur në minutën e 94-të.

Liverpooli tani pret ta mësojë kundërshtarin e radhës në kupë. /Gazeta Express

 

COMMENTS